bolognamia


Vai ai contenuti

Bulgnais

Bulgnais



"Bologna è una vecchia signora dai fianchi un po' molli col seno sul piano padano ed il culo sui colli. Bologna arrogante e papale, Bologna la rossa e fetale, Bologna la grassa e l' umana, già un poco Romagna e in odor di Toscana..."


Acsè un espert del bon vivar, Francesco Guccini, al conta la su Bulaggna in onna del sou famousi canzunatt.
Mudestamant, zarcarò anche me ed cunteruv Bulaggna.

In cla pagina que an trovarì incosa invatta ai monument, musei e pordig, che però a truvarì prezisi in tal guid con tutt i particuler près al pont d' accuglianza par i viazadur ch'as trova såtta al pordig dal Palazz dal Pudstè.
Me a n'ho brisa la preteisa ed riuscir a cunterv tott qual c'as pol truver a Bulaggna, mo am piasrev ed feruv guinter un po' curius, magari feruv vgnir la vojja ed fer un viazten per fer du pas såtta i portig.

Piâza Ma<åur

Una gita a Bulaggna la taca sanz'eter da
Piaza Mazåur ch'lè al cor storic, aministrativ ed uman dla zitè. Qué i en soquant di prinzipel monument e al Palaz Comunel, que is artroven i zitaden in uccasion d' event o manifestaziån, que tótt i dé imperan a caminer (e a corrar) tant ragazù bulgnis, cercand l'equilebbri ist mantar chi corran dri ai pizón invatta al "carsintån". Piaza Mazåur lè anc al spèc dla zitè: ai é zant a tutti agli åur, cla ciacàra ed pulettica, ed sport, dal Sendic e dal guéran e che la zairca ed tireruv in mez s'av farmé ad ascultèr qui chi la bàtan; a i è la tårr dl arlói, la tårr dl Arengo dal palaz dal Pudstè

Ades travarsè la piaza, mitiv a seder invatta i scalen ed San Ptroni e in faza a vdì al
Palaz dal Pudstè
ch'l'era la sed di magistrè dal gueran d'la zitè, al prem pian ai é un salon grandessum (ssantun par quatorg meter), satta al pordg ai é l'ufézzi d'infurmazian pr'i turesta e suquant cafà storic.
A man drétta ai é al Palaz di Banch, in dóv al taca al pordg dal Pavaiån c'al porta al Palaz d'l'Archiginesi c'la fo la premma sed d'l'Universitè 'd Bulaggna (Alma Mater Studiorum), la piò antiga dal Månd! Ades l'é sed dal
Museo Zevic Archeologic con di repert prezius di Etrosc, Egizian, Roman, Villanovian e po' anch la Biblioteca Pobblica d'l'Archiginesi. In t'al Ciavadur (Via Clavature) ai é la Cisa 'd Santa Maria d'la Vetta. Dantar ai é al "Compianto sul Cristo Morto" fata da Niccolò da l'Erca. Såul qual al merita una visita a Bulagna. In tal Ciavadur is trovan anch di negozi storic ed Bulaggna . On ed quisti l'é l' Ottica Paoletti c'lé al mi furnidour ed materiel fotografic.
In banda a la Basellica ai é al
Palaz di Nudèr con sou fnester a "bifora" e al marladur ghelfi. A Bulaggna deres apuntamant ed nanz al nommer 1, vol dir artruveres ed nanz al Palaz di Nudèr parchè lé as trova la Tabacarì nommer 1.
A man stanca ai è al
Palaz d'Accursio, che ades l'é la sed 'd rapresentanza dla Cmona ed Bulaggna. In vatta a la facè ed Palaz d'Accursio a psi vaddar la Stetua dal Pepa Gregorio XIII (che dimondi i craddan cla seppa la stetua ed San Ptroni) e po' ai é una belessima Madòna col Fangen fata da Nicolò da Bari (cal fò dett po' "dell'arca"). Dal curtil Interan dal Palaz, su pr'al scalon dal Bramante, as va indov ai é la "Collezione d'Arte Municipale" . Quand a si so al secnd pian, anch s'an andì a visiter al museo, a psi vaddar totta la piaza e in t'al sfond la zemma d'la tor longa. In t al ba§amänt dal palàz i en dåu âcuil. Onna dal dåu as disc la séppa fata da Michelangelo quand al steva ed cà a Bulaggna.
Mo al monumant che forsi l'è al piò amè dai Bulgnis l'è la
Basellica ed San Ptroni, cl'é la quenta cisa (par grandazza) dal mond, cla riesc a essar belessima anch se la su facè la n'è mai ste finé. L'é dediche al "protetour dla citè e dantar ai en tant qui da vaddar, prezius e antig com la granda Meridiena e al quater crous che, al epoca di rumàn , i eran messi davanto al quater port dla zitè.
A man dretta dal Palaz d'la Cmona ai é Piaza dal Nettuno con la
funtana dal Nettuno, le ai è la fazé dal Palaz ed Ra Enzo, c'al fò costrué in tal 1244-46 par gvinter la sede dla Cmona, invezi la gvintè la parson durè dal Ra Enzo ed Sardagna,fiol ed Federico II, imperatour ghibelen, cal fo fat parsunir in tla battagla ed Fosselta, venta dai guelf bulgnis, e al fo tgno le in parson par quesi tranta an (l'era al 1249). Dap avair fat soquanti beli fotografì ed nanz al Nettuno dal Giambologna, a si pronti par ander dantar al "quadrilatero". Un ultim sguard al Zigant (i bulgnes i al ciamen acsè parchè l'è elt piò ed tri meter!) e po' … caminer! De dri dal Palaz di Banch ai e tanti stradeini che i en le dal medio evo con i lardarù, i frutarol, i furner... e po butgher e artigian...
In t'al Drapperi (Via Drapperie) ai e
Tamburen, al lardarol e rustizir piò famous ed Bulaggna (da suquant an l'ha anch onna tratturi a "self service" averta anch a mezdé). Un po piò zo, in t'al Caprari (via Caprarie) ai e Atti, un antig furner in dov a psi cunprer al bon pan bulgnais, (avi da pruver la carsant, magari con stramez soquanti fatt sutili ed murtadela!) e la pasta frasca : turtlen, taiadel, turtlon con l'arcota, strichett....
Le ateis ai é al Marchè cuert con fruta e verdura, in ti Urevs (Via Orefici) ai e al Bar Otello. Qui se scor soul ed calcio e dal Bulaggna FC (I en tott alenadur...). In ti Ranuc (Vicolo Ranocchi) ai e un'ustari ("il baretto") in dov l'ost av sarves soul al ven... sa vli magner un panen premma pasè da Atti e comprè al pan, e pò da Tamburen par al companatic...
Detta stra no e no, la murtadela fata a Bulaggna l'è totta bona, ma la miåura le quella fata da Pasquini & Brusiani .

Al dåu tårr

Da que travaerse la stre, fe du pas e arivè in
via Rizzoli. Onna stre abastanza nova (fine '800) c'la va da Piaza Mazour a Piaza 'd Porta Ravgnena, in fond is vaddan al dåu tårr, sembol e argoi ed Bulaggna. I en ste fati circa in t'al mell e zant (1100) e, cumpagna totti c'agli etri torr, i ciapen al nom da la famaja che ai ha fati. La piò basa l'e la Garisenda (quarantot meter (48 metri), la fo sbasè a la metè dal mell e tarzant (XIV sec.) parchè la pindeva dimondi ), e la piò elta l'é qualla di Asinelli cl'é nuvantaset meter (97 metri). Se al schel inv fan brisa pora, mitè man al bisachen, tirè fora 3€ e andè in vatta a la tor. Dop 498 scalin a psi vaddar al piò bel panorama ed Bulaggna, e piò la giurneda l'é cera e piò luntan l'ariva l'oc...
Tra via Altabèla e via Sant'Alò (qual c'al muré e po' s'amalò) a i en èter dåu tårr interesànti:
la tårr Azzoguidi e la tårr Prendiparte, detta anche "Incoronata"

Bulaggna l'aveva piò ed zant torr (per che i fossen 180) ades ai n'é avanze zirca una vintena e intiri sulamant trai. Dimondi i en crulè par vciaia , dagli etri per recuperer al pred , ma piò che eter l'é ste la guera che che is fevan al famai unna con cl'etra, premma col catapult e po con in canon...
Da satta al dou torr, ad fianc al palaz di
Strazarù (l'é al palaz in dov ai é Feltrinelli) as trova al Ghetto Ebraico indov al guern dla Cisa al cunfinè i ebrei i dal'8 ed maz 1556 fen al 1593. Que da poc l'é ste tott restaurè, in t'al stre ai é ste fata la salghè e i lampion in fer batò. Lé a psi truver anch in peccol museo di Ebrei. In mèz a la fazè dal palaz di Strazarù, in vatta al balcån, al per che ai séppa una fnestra ed dåpp a una tannda: drì da la tannda ai é una Madona che, par tradiziån, la ven scuerta solo quan la Madona ed San Lucca la ven zå.
Premma d'nfiler Stre Mazour, de un'ucè su per Stre Castion (via Castiglione) : ai é al
Palaz dla Marcanzi con al balcunzen arcamè c'al per ed pezz, e, ala sinestra, al pordig ed lagn ed Palaz Grassi e la tårr Alberici.


Piazza Santo Stefano

Andand zo par Strè Mazour, al nommer dg'nov (n° 19), as ariva a Palaz Isolan col pordig ed lagn. L'é ciamè al Pordig dal trai frazz.La storia la dis che un maré tradé as vle vandicher d'la mujer e al paghé tri arzir. La dona però l'as presenté a l'inpruvis totta nuda e i tri bazurlon i sbaglien mira e al frazz is pianten in tal sufett dal pordg...
Da que, atravers la gallari d'la Court Isolan , guardéi negozi po' arivé in t'la
Piaza S. Stevan.
La Cisa ed S. Stevan l'è un gropp ed cis, una dantar ql'eltra, d'etè diversi. I en ciamè al Set Cis, anche se ades ai n'è avanzè soul quater, tot un armasd ed curtil, pordig, alter…. Impurtant da vaddar la tamba ed S. Ptroni e al chioster col pordig in stil romanic.

Via D'Azeglio e Via De' Carbonesi

Ades turné in dri in Piaza Mazour e infilé Via D'Azeglio. Al pez cumpreis da Piaza Mazour e Via de' Carbonesi l'é totta pedonel: la per fata aposta per fer "sopping"! Zirca a metè, ed front a la Cisa di Celesten, ai è la Court ed Galozz c'l'è ancora cum l'era in tal medioevo: la tor e la court insom i fevan ub fortilezzi cumpat e prutet vers l'esteren. La famaja di Galozz i eran tott prepotent , stra al mell e zant e al mell e dusant stra ress, congiur e eter casen , i miten i priguel ventquater volt la zitè. Par capir basta cunter la storia dla Vargennia d' Galozz e Alberto d'Carbuneis : i eran inamurè e i se spusen in camuffa, ma al pered ed li al scruvè incosa e al mazé al spous, e tutt i parent che i avevan aiuté. La povra Vargennia, dal dulour la s'impiché. In fond a Via D'Azeglio a giré a man dretta per via De' Carbonesi . Sotta al pordg a catè al negozi ed Majan: se av pies la cecoleta le obbligatori anderi. Fe cont che i cecolaten FIAT i an inventè dantar a cal negozi lé! Al negozi, in pur stile liberty l'è acsè dal mell e otzant tranta quater (1834), ma la ditta le stè fundè in t'al mell e setzant novantasi (1796) . Sobbit ed là da Majan 'na volta ai era i "Magazzini COIN". Purtrop i en asrè, ma quand i eran avert , satta i paviment ed cristal dal negozi, se vdeva qual che ai è avanzè d'un antig Teatr ruman.

Via Indipendenza

Da Piaza dal Nettuno la taca Via dell'Indipendenza, famousa par al "sopping" e la pasegè dal sabet dop mezdé. Sobbi zo, a man dretta, as cata al
Dom ed Bulaggna: la Catedrel ed San Pir c'la fo fata in t'al novzantdis (910) ma dop i an mess al man in di mondi per dal mudefic e di restauri. S.Pir l'è sampar ste al sembul dal pudeir dal Vatican, e San Ptroni invezi l'era la cisa dla pupolazion.In faza a San Pir ai è l'Hotel Baglioni, c'lè al piò lussuos ed Bulaggna. Al sou sel i en decorè con i afresc dei Carracci. D'nand avanti as ariva a l'incrous con Via Augusto Righi, le a girè subit a man dretta e po' su par i Malcuntent (Via Malcontenti). Da le a psi vaddar un di tanti canii ch'i giren sotta al stre ed Bulaggna. L'acqua l'ariva dal cius ed Casalacc e i en ste finé a la fen dal mel e zant (1100) par fer ander i mulene e al filand d'la saida. Al stas canel al psi vaddar da via Piella, atrvers un fnistrot. Se cheso mai al fnistrot l'è sre, tiré la marlatta e l's'averra. Samper in via Augusto Righi, sobbit dop Via Malcontenti, ai è un rastel ed fer da dov as vad l'antig batoc dal canel. Da le, d'ested, i partessan al git in gummon dantar al canel. As fa "rafting" in zitè! Se a si dal cal pert le al vener o al sabet, poc piò avanti par via indipendenza, arivè in piaza ot agost in dov as fa la Piazola. Le as vand ftieri e scherp, ma as pol truver d'incosa.

San Francesco

Da Piaza dal Nettuno, a man dretta andé vers al dou torr, a man stanca a ciapè via Ugo Bassi e arivè in Piaza Malpighi e piaza San Franzasc con la su bela cisa in gotic franzais In t'al zarden dla cisa as trovan al
Tomb di Glussadur che i fon i prem méstér dl'Universitè dal dusant (Accursio pèdèr e fiol, Odofredo, Rolandino de' Romanzi)

San Domenico

In Piaza S.Domenico, danter la
Basellica ed S. Domenico, andé a vaddar la famousa " Arca di S.Domenico" con la relequia dal Sant. Par ferla completa ai é vlo zenqzant an (1265 - 1768). I an lavurè in tant, ma i piò famus i fon Niccolò da Bari (c'al guitè po' dell'Arca pa ste lavurir) e Michelangelo. In tla piaza e psi vadder anc al tomb ed Rolandino de' Passeggeri e Egidio Foscari, Di eter mester glussadur.

San Luca

Se avi la gamba bona e avi voia ed fer una bela scarpinè, a psi ander in vatta a
La Guerdia so p'ral pordig ed San Locca. Al partess da Porta ed Saragoza e l'arìva al Santueri dla Madona dla Guerdia. Dantar al Santueri l'é cunsarvè onna icona bizante\na che la divuzion vol cla seppa ste fata da l'Evangelesta Luca. La tradizion la dis che i ragaz i n'an brisa da purter l'ambrousa a San Locca, se no i la perdan...
Al portig l'é long 3,6 Km e sizantssantasi (666) èrc par ariver fen invatta a dusantnuvantot meter (298 m). La not la Basellica e tot al pordg l'é illuminè in manira che as vad da dimondi luntan. Da li as vadd tutta la zite e as pol fer del beli fotografì dal panorama e po' ai é al ristorant se la salida la mos l'aptid...

Nuvitè:
Dal 28 ed znèr l'é avért al "Museo della Storia di Bologna". L'é in Strè Castiòn, I n t al palâz Pepoli vèc. Vèl la panna pérdér un dé par visitèrèl con cura.


A voi ringrazier Gigén Livra, Tiziân 'd Costa, Pevel 'd Canè, Bérto Mnarén, che con i su libèr i m'an dè l'ispiraziån par fêr cal sit qué, e dai su lìbèr ai ho tolt sù a man pé@ni agli idèi par ferel.

Par avair infurmaziån, par criticher, par curezar di erúr, a psi scrivar:
bolognamia@altervista.org
Zarcarò d'arspåndar a tótt.

Sît da visiter:
Al pånt dla biånda
Sît Bulgnais
Al tårr ed Bulagnna
Libera Terra

Rizèta dla stmèna

Cavatelli con susézza e cuzlùt
Dó§ par quâter

  • Trî étto e mêz ed cavatelli o strozaprît o garganèl. Comunque pasta curta
  • Un étto e mêz ed susézz frâsca
  • Un étto e mêz ed cuzlùt tajiè sutìl
  • Onna scàtla ed pundór plè
  • Mêz étto ed zivålla tajiè sutìl
  • Mêz bichìr ed vén bianc gros
  • Ôli bån, sêl, pàvvar


Fèr ciapèr la rósa a la zivålla i,nt l'ôli, zuntèr i cuzlùt tajiè sutìl e fèr ciaper savåur par socuànt minûd, po' la susézza sbrislè, fèri ciapèr la rosa e fèr svapurèr un mèz bighìr ed vén.
Zuntèr i pundór tridè con la furze\na, aiustèr sêl e pavvar e purtèr a cotùra
Cû§er la pâsta, sculèrla, ferla saltèr il padèla con la cónza e a la fén la fåurma come se l'anvéss.


Home Page | italiano | Bulgnais | Bologna com'era | Detti e proverbi | Mappa del sito


Torna ai contenuti | Torna al menu